Ҷаласаи Гурӯҳи Авросиё оид ба муқовимат ба шустани пул дар Душанбе

Душанбе, 10.11.2014. (АМИТ «Ховар», Покизаи Шодмон). — Имрӯз дар Душанбе ҷаласаи  пленарии Гурӯҳи Авросиё оид ба муқовимат ба шустани пул ва маблағгузории терроризм оғоз шуд.   
Ба иттилои Хадамоти матботи Бонки миллиии Тоҷикистон, дар кори ҷаласа намояндагон аз нӯҳ давлати аъзои Гурӯҳи Авросиё — Беларус, Қазоқистон, Қириғизистон, Русия, Туркманистон, Ӯзбекистон, Чин, Ҳиндустон ва Тоҷикистон,  давлатҳои мушоҳиди ин Гурӯҳ — Арманистон, Афғонистон, Лаҳистон, Украина, Фаронса ва дигарон иштирок менамоянд. Дар ин ҷаласаҳо ҳамчунин намояндагони созмонҳои байналмилалӣ, дигар гурӯҳҳои минтақавии Гурӯҳи татбиқи чораҳои молиявии муқовимат ба шустани пул (ФАТФ) низ ҳамчун мушоҳид ширкат меварзанд. 
    Имрӯз мутобиқи барномаи кории чорабинии мазкур ҷаласаҳои гурӯҳҳои кории зерини Гурӯҳи Авросиё оид ба масъалаҳои ҳуқуқӣ, ёрии техникӣ, мониторинги хавфҳо баргузор мегарданд. 
    Дар ҷараёни баргузории ҷаласаҳои имрӯза ҳисоботи намояндагони як зумра давлатҳо доир ба корҳои иҷрошуда дар ин ҷода мавриди муҳокима қарор гирифта, баҳогузорӣ мегарданд.