А. Қодирӣ: Сифати хизматрасонии тиббиро баланд бардоред

Душанбе, 12.11.2014 (АМИТ “Ховар”, Мавҷуда Анварӣ).-Дирӯз дар вилояти Суғд бо иштироки раиси вилоят Абдураҳмон Қодирӣ бинои асосии Беморхонаи клиникавии бачагонаи вилоятӣ, ки соли 1938 бунёд ёфтааст, пас аз таъмиру навсозӣ мавриди истифода қарор дода шуд.Таъмири бино аз ҳисоби буҷети вилоятӣ бо харҷи 1 миллиону 200 ҳазор сомонӣ сурат гирифта, ба маблағи 300 ҳазор сомонӣ бо таҷҳизоти зарурӣ таъмин шудааст. Дар беморхона 300 нафар корманд ва мутахассиси соҳибтаҷрибаи соҳаи тиб ба беморон хизмат мерасонад.Раиси вилоят дар назди кормандони беморхона таъкид намуд, ки бо мусоидати мақомоти иҷроия дар ояндаи наздик муаммоҳои дигари табобатгоҳ, аз қабили барқарорсозии низоми ягонаи гармидиҳӣ, таъминоти он бо таҷҳизоти муосири ташхисию табобатӣ ва мошини ёрии таъҷилӣ ҳалли худро меёбанд.Абдураҳмон Қодирӣ ҳамзамон ба роҳбарияти ин муассисаи тиббӣ тавсия дод, ки барои фаъолият ба беморхона кадрҳои ҷавон ҷалб гарданд ва сифати хизматрасонии тиббӣ ба аҳолӣ боз ҳам боло бурда шавад.