«Акси садои «Дидор» дар Конибодом

Душанбе, 6.11.2014. (АМИТ «Ховар»). — Аз 6 то 9 ноябр дар Театри драмаи мусиқии ба номи Т.Фозиловаи шаҳри Конибодом, дар рӯзҳои таҷлили 20-солагии Конститутсияи (Сарқонуни) Ҷумҳурии Тоҷикистон, барномаи Синамобазми байналмилалии «Дидор»-«Акси садои «Дидор» бахшида ба 110 –солагии Комил Ёрматов бо намоиши филмҳои Осиёи Марказӣ, Арманистон, Гурҷистон, Россия, Афғонистон, Эрон ва Тоҷикистон баргузор мешавад.Ба иттилои раиси Иттифоқи синамогарони Точикистон ва директори синамобазми байналмилалии «Дидор» Сафар Ҳақдодов, ташаббуси синамогарони Тоҷикистонро ҳукумати шаҳри Конибодом ва Сафорати ИМА дар Тоҷикистон дастгирӣ менамоянд. Расми ифтитоҳи ин барнома бо намоиши филми «Вопасин навор», муаллиф Нури Наср ва коргардон Абулҳай Зокиров, истеҳсоли Муассисаи давлатии «Телевизиони Сафина» оғоз шуда, дар давоми 4 рӯз 22 филми кӯтоҳу пурраметражи ройгон ба тамошо гузошта мешаванд.Тамошобинони шаҳр бевосита бо коргардони шинохтаи филмҳои тасвирӣ-Бахтиёр Қаҳҳоров, синамошиноси маъруфи тоҷик Саъдулло Раҳимов вохӯрда, аз дастовардҳои синамои тоҷик ва чаҳон суҳбат хоҳанд кард.Ин барнома бо намоиши филми навсохтаи синамогарони ҷавони тоҷик «Паймон», бо коргардонии Муҳиддини Музаффар, ки зода ва сокини шаҳри бостонии Конибодом ҳастанд, анҷом меёбад.