Арҷгузорӣ ба Сарқонуни кишвар

Душанбе, 04.11.2014 (АМИТ «Ховар», Фарзонаи Давлат).- Имрӯз дар дастгоҳи марказии Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон бахшида ба Рӯзи Сарқонуни Ҷумҳурии Тоҷикистон чорабинии тантанавӣ баргузор шуд. 
 Бино ба иттилои мудири бахши таҳлилу иттилоотии кумита Ҷалолиддин Нуров, дар чорабинии мазкур сохторҳои дастгоҳи марказӣ ва ташкилотҳои низоми кумита, Раёсат ва бахшҳои ҷавонон, варзиш ва сайёҳии шаҳри Душанбе иштирок намуданд. 
Раиси кумита Аҳтам Абдуллозода ҳозиринро ба 20-умин солгарди Сарқонуни кишвар шодбош гуфта, онро бахтномаи миллат баён дошт. 
Гуфта мешавад, ки мавсуф аз таърихи қабули Сарқонуни кишвар ёдовар шуда, пешравию шукуфоӣ ва созандагию ободкории кишварро самараи ин муқаддасоти давлатӣ баён доштааст.
Дар охир роҳбарияти кумита ҳозиринро вазифадор намуд, ки барои сазовор ҷашн гирифтани ин рӯзи таърихӣ  дар корхонаю ташкилоти худ масъул буда,  муҳтавои ин муқадасотро ба насли наврасу ҷавон омўзонанд ва онҳоро ба ватандӯстӣ ва арҷ гузоштан ба қонунҳое, ки аз Сарқонун сарчашма мегиранд, ҳидоят созанд.