Ашан аввалин гипермаркети худро дар Тоҷикистон мекушояд

Душанбе, 17.11.2014 (АМИТ «Ховар», Мавҷуда Анварӣ).- Дар мулоқоти Президенти кишвар Эмомалӣ Раҳмон ва Президенти Бонки аврупоии навсозӣ ва рушд Сума Чакрабартӣ, ки субҳи имрӯз доир гардид, масоили вобаста ба рушди ҳамкории Тоҷикистон бо ин муассисаи бонуфузи молиявӣ мавриди баррасӣ қарор гирифтанд. Пас аз анҷоми мулоқот Президенти Бонки аврупоии навсозӣ ва рушд Сума Чакрабартӣ андешаҳояшро дар ҳузури хабарнигорон чунин иброз намуд:
«Имрӯз мо бо Ҷаноби олӣ Президенти Ҷумҳурии Тоҷикистон явохӯрии дараҷаи олиро доир намудем. Ин сафари аввалини Президенти Бонки аврупоии навсозӣ ва рушд дар Ҷумҳурии Тоҷикистон дар нӯҳ соли охир мебошад. Мо инчунин масъалаҳои ҳамкории байни Бонки аврупоии навсозӣ ва рушд ва Ҷумҳурии Тоҷикистонро  баррасӣ кардем. Соли ҷорӣ яке аз солҳои бомуваффақият барои мо мебошад, чунки сармоягузориҳои мо ба Ҷумҳурии Тоҷикистон тақрибан ба 100 млн. доллари амрикоӣ расид. Мо инчунин барномаи стратегияи ҳамкории Бонки аврупоии навсозӣ ва рушд дар Тоҷикистонро барои давраи оянда баррасӣ намудем, ки дар он масъалаҳои аз бунбасти коммуникатсионӣ баровардани Ҷумҳурии Тоҷикистон, рушди инфрасохтор, рушди низоми бонкдорӣ ва рушди энергетика баррасӣ шуданд ва ба инобат гирифта хоҳанд шуд. 
Албатта, бахши энергетика барои Ҷумҳурии Тоҷикистон ниҳоят соҳаи муҳим мебошад, ки  он дар маркази диққати стратегияи нави ояндаи мо қарор гирифтааст. Дар бобати ҷаласаи имрӯзаи  Шӯрои машваратӣ ман гуфтаниям, ки  Ҷумҳурии Тоҷикистон пайроҳаи дурустеро барои рушди худ интихоб кардааст». 
Сума Чакрабартӣ Ҷумҳурии Тоҷикистонро яке аз шарикони аз ҳама муҳими Бонки аврупоии навсозӣ ва рушд арзёбӣ карда, зикр намуд, ки фардо ният дорад ду ҳуҷҷати ниҳоят муҳимро ба имзо расонад. Яке аз ин ҳуҷҷатҳо оид ба сармоягузорӣ бо ширкати «Ашан» мебошад, ки аввалин гипермаркети худро дар Тоҷикистон хоҳад кушод ва дигар ин созишнома оид ба додани қарз бо асъори миллӣ ба ташкилоти Имон интернешнл мебошад, ки барои рушди сохтори хусусӣ, алалхусус соҳибкорони хурду миёна ниҳоят нақши бузургеро мебозад.