Дастаи мунтахаби Тоҷикистон як сатр поён шуд

Душанбе,  28.11.2014. (АМИТ «Ховар»).-  Дастаи  мунтахаби  Тоҷикистон  дар  рейтинги  нави   дастаҳои  мунтахаби  Федератсияи   байналмилалии  ассосиатсияҳои  футбол (ФИФА)  аз ҷойи  134 — ум  ба ҷойи  135 — ум  гузашт.
Тавре  ки   аз  Федератсияи  футболи  Тоҷикистон  хабар  доданд,  дастаи   мунтахаби  кишвар  чун  моҳи  гузашта  214  хол дорад, ки  ин  баробари  холҳои дастаи  мунтахаби  Озарбойҷон  аст.  Дастаи  Мӯҳсин  Муҳаммадиев   дар  байни  собиқ  кишварҳои  ИҶШС  мақоми  дувоздаҳумро  касб  намуда,  аз  дастаҳои Қазоқистон,  Туркманистон ва  Қирғизистон пеш  гузаштааст. Дастаи  мунтахаби  Украина  ҷойи  26 — ум,  Русия  ҷойи  31 — ум ва Ӯзбекистон  ҷойи  74 — умро  ишғол  менамоянд. 
Дастаи  мунтахаби  Тоҷикистон  дар  байни  46 дастаи Конфедератсияи  футболи  Осиё нисбат ба  моҳи  октябр  як  сатр поён  рафта,  ҳоло  ҷойи  19 — умро  ишғол  менамояд. Дар қитъаи  Осиё   дастаи  мунтахаби  Ҷопон ҷойи  аввал,   дастаи  мунтахаби  Эрон  ҷойи  дуюм  ва  дастаи  мунтахаби  Куриёи  Ҷанубӣ  ҷойи  сеюмро  касб  намудаанд.
Қаҳрамони  ҷаҳон  дар  соли  2014  дастаи   мунтахаби  Олмон  бо 1725  хол пешсафи рейтинг  аст. 
Дастаҳои   Аргентина (1538) ҷойи  дуюм, Колумбия (1450) ҷойи  сеюмро  ишғол  менамоянд. Дастаи  мунтахаби Белгия  дар  ҷойи  чорум, Нидерланд  дар  ҷойи  панҷум,  Бразилия  дар  ҷойи  шашум  қарор  доранд. 
Ёдовар  мешавем, ки рейтинги  ФИФА  соли  1993 ҷорӣ  гардида  буд, ки  мувофиқи  он  шумораи  холҳо  аз  рӯи  натиҷаи дастаҳои  миллӣ  тайи  чор  сол ба  ҳисоб  гирифта  мешавад.