«Ганҷи сухан» дар ДДХ
Душанбе, 18.11.2014.(АМИТ «Ховар»,Раъно Нусратуллозода).-15 ноябр дар факултаи филологияи тоҷики Донишгоҳи давлатии Хуҷанд (ДДХ) ба номи академик Бобоҷон Ғафуров нишасти 122-юми маҳфили илмӣ адабии «Ганҷи сухан» бо иштироки устодон ва донишҷӯён баргузор гардид.
Тавре ки аз донишгоҳи мазкур иттилоъ доданд, ректори донишгоҳи мазкур Анвар Мақсудов гуфт, ки ин маҳфили бонуфуз, ки бо ибтикори олими соҳибназари тоҷик марҳум профессор Абдулманнони Насриддин аз як нишасти хурд ва бо ҳайате иборат аз чанд нафар адибу олим дар кафедраи адабиёти классикии тоҷик шакл гирифта, дар кутоҳтарин муддат ба маҷлиси бузурги дорои мақоми вилоятӣ табдил ёфта, дар нишастҳои он на танҳо олимону шоирони қаламрави вилоят, балки суханварону суханшиносон аз тамоми ҷумҳурӣ ва берун аз он ширкат ва маърӯзаҳои илмӣ ироа намуда, маҳсули эҷодиёти рангини хешро манзур намудаанд.
Дар маҳфил доир ба мавзӯи «Осори пурбаҳои илмӣ, андешаҳо перомуни куллиёни ҳафтҷилдаи профессор Абдулманнони Насриддин» доктори илмҳои филологӣ, профессор Абдуҷамол Ҳасанов гузориши муфассал ироа намуд.