Иштироки Қ. Расулзода дар ҷаласаи Шӯрои Сарвазирони ИДМ

Душанбе, 21.11.2014. (АМИТ «Ховар»). — Рӯзҳои 20-21-уми ноябри соли равон Сарвазири мамлакат Қоҳир Расулзода барои иштирок дар ҷаласаи навбатии Шӯрои Сарони ҳукуматҳо-Сарвазирони ҷумҳуриҳои узви Иттиҳоди Давлатҳои Мустақил бо сафари корӣ дар шаҳри Ашқободи Туркманистон қарор дошт. 20 ноябр дар ҳошияи ҷаласаи навбатии Шӯрои Сарони ҳукуматҳо-Сарвазирони ҷумҳуриҳои узви ИДМ дар шаҳри Ашқобод мулоқоти Сарвазири мамлакат Қоҳир Расулзода бо Президенти Туркманистон Гурбонгули Бердимуҳамадов баргузор гардид. Дар оғози вохӯрӣ аз ҷониби Сарвазири мамлакат паёми шодбошии Президенти Ҷумҳурии Тоҷикистон Эмомалӣ Раҳмон ба Президенти Туркманистон расонида шуд. Зимни мулоқот масоили ҳамкориҳои байниҳукуматии Тоҷикистону Туркманистон дар соҳаҳои мавриди таваҷҷуҳи тарафҳо қарор дошта, аз ҷумла вазъи кунунӣ ва дурнамои ҳамкориҳои дуҷониба дар соҳаҳои энергетика, тиҷорат ва роҳу нақлиёт баррасӣ шуд.21 ноябр ҳайати Ҳукумати Ҷумҳурии Тоҷикистон бо роҳбарии Сарвазири мамлакат дар кори ҷаласаи навбатии Шӯрои Сарони ҳукуматҳо-Сарвазирони кишварҳои узви ИДМ иштирок намуданд. Дар ҷаласаи навбатӣ наздик ба бист масъалаи марбут ба ҳамгироиҳои иқтисодию тиҷоратӣ, энергетикӣ ва илмию фарҳангии давлатҳои узви ИДМ муҳокима гардида, қарорҳои дахлдор ба имзо расиданд.Сарвазири мамлакат Қоҳир Расулзода зимни суханронии худ изҳор дошт, ки имконоту захираҳои давлатҳои узви иттиҳод ҷихати тавсеаи ҳамкориҳои иқтисодию тиҷоратӣ, энергетикӣ, роҳу нақлиёт,илмию техникӣ ва фарҳангӣ афзун буда, Ҷумҳурии Тоҷикистон ҷонибдори рушди бемайлони ҳамкориҳои кишварҳои иттиҳод дар соҳахои афзалиятнок мебошад ва дар ин самт истифодаи пурраи захираю имконоти бузурги ҳамкориҳои дуҷониба ва бисёрҷонибаи давлатҳои аъзоро пешниҳод менамояд.Сарони ҳукуматҳо-Сарвазирони кишварҳои узви ИДМ дар нишасти навбатии худ бо иштироки ҳайатҳои васеъ ҳамзамон масъалаҳои асосии рӯзномаи ҷаласа, рафти татбиқи қарор оид ба тиҷорати озод ва Стратегияи рушди ҳамкориҳои давлатҳои узви ИДМ-ро барои то давраи соли 2020, ки рушди ҳамкориҳои давлатҳои аъзоро дар соҳахои илму фарҳанг, туризм ва технологияи нав пешбинӣ менамояд, баррасӣ намуданд. Аз баргузории кори ҷаласаи навбатии Шӯрои Сарони ҳукуматҳо-Сарвазирони давлатҳои ИДМ дар нишасти матбуотӣ бо иштироки доираи васеи намояндагони васоити ахбори умум натиҷагирӣ карда шуд.