Иштироки футболбозони ҷавон дар мусобиқоти барои дарёфти Ҷоми Иттиҳод — 2015

Душанбе,  21.11.2014. (АМИТ «Ховар»).- Дастаи   мунтахаби  ҷавонони  Тоҷикистон  оид  ба  футбол  (бозингарони  соли таваллудашон  1994 ва аз он  ҷавонтар)  бо  роҳбарии  сармураббӣ  Алишер  Тӯхтаев  дар  мусобиқоти байналмилалӣ  барои  дарёфти  Ҷоми Иттиҳод — 2015, ки  аз  16  то  25  январ дар  шаҳри  Санкт — Петербург баргузор  мешавад,  иштирок  менамояд. 
Тавре  ки  аз Федератсияи  футболи  Тоҷикистон  хабар  доданд, ҳайати пурраи  иштирокдорони  мусобиқот  ҳанӯз  муайян  нашудааст. Тахмин  меравад, ки  дар  ин  мусобиқот  16  дастаи  футболбозони  ҷавон  иштирок  мекунанд. То имрӯз 11  даста,  аз ҷумла дастаҳои  мунтахаби ҷавонони  Тоҷикистон,  Русия  ва Ҷумҳурии  Африқои  Ҷанубӣ барои   иштирок  дар  ин мусобиқот  дархост  додаанд. 
Ёдовар  мешавем, ки дастаи  мунтахаби  Украина дар  вохӯрии  ниҳой  дастаи  мунтахаби  Русияро   бо  ҳисоби  4:0 мағлуб  сохта,  ғолиби Ҷоми Иттиҳод  —  2014 гардида буд.