Кӯлоб: Чиниши пахта идома дорад

Кӯлоб, 12.11.2014. (АМИТ «Ховар», Сулаймон Холов).- Новобаста ба бориши боронҳои фасли тирамоҳ кишоварзони ноҳияи Кӯлоб бо истифода аз рӯзҳои офтобӣ ҷамъоварии пахтаро идома медиҳанд. Дар ҷамоати деҳоти «Зарбдор»-и ноҳия чор кооперативи истеҳсолӣ ва понздаҳ хоҷагии деҳқонии пахтакорӣ мавҷуд аст, ки ҳамасола аз заминҳои ин хоҷагиҳо ҳосили фаровон рӯёнида мешавад.Соли равон кишоварзони ҷамоати мазкур дар 692 гектар замин навъҳои «Ориён» ва 65-30 кишт карда, бо риояи қоидаҳои агротехникӣ ҳосили хуб парваридаанд.Имсол мувофиқи нақшаи дурнамо кишоварзони ҷамоати деҳоти «Зарбдор» мақсад доранд 1 ҳазору 533 тонна пахта ҷамъоварӣ намоянд ва барои иҷрои нақша ҳамарӯза садҳо нафар саҳмдорон ба саҳро баромада, аз 10 то 15 тонна пахта ҷамъоварӣ менамоянд. Дар айни замон хоҷагиҳои пахтакори ҷамоати деҳоти Кӯлоб дар чиниши пахта пешсаф буда, иҷрои нақшаи дурнаморо ба 93 фоиз расонидаанд.