Консерти эҷодӣ дар Театри опера ва балет

Душанбе,  21.11.2014. (АМИТ «Ховар»,  Фарзона  Достонзода).-  Аз  21  то 22  ноябр  дар  шаҳри  Душанбе  ба  ифтихори  пленуми навбатии Иттифоқи  бастакорони  Тоҷикистон  консерти  эҷодӣ  баргузор  мешавад. 
Тавре  ки  аз  Иттифоқи  бастакорони  Тоҷикистон  ба АМИТ «Ховар»  хабар  доданд,  21  ноябр  дар  саҳнаи  Театри  давлатии  опера  ва  балети  ба  номи  С.Айнӣ  дар  иҷрои  оркестри  симфонӣ  бо  роҳбарии сардирижёр Анвар  Шоймуродов композитсияҳои  Фозил  Солиев,  Зиёдулло  Шаҳидӣ,  Юрий  Тер — Осипов  ва ходимони  дигари  намоёни  фарҳанг  танинандоз  мешаванд.
22  ноябр  дар  толори  консертии Иттифоқи  бастакорони Тоҷикистон  консерти  оркестри  камеравӣ бо  иштироки пианинонавозон Рафиқа  Сангинова, Хосият Олимова, Ҳунарпешаи  мардумии  Тоҷикистон  Бурҳон  Маҳмадқулов  ва  дастаи ғиҷҷакнавозон — дастпарварони коллеҷи  мусиқии  ба  номи З.Шаҳидӣ  баргузор  мегардад.