Муқовимати фаврӣ-ҷустуҷӯӣ ба воситаи хатсайри шимолӣ

Душанбе, 11.11.2014 (АМИТ «Ховар», Мавҷуда Анварӣ).- Аз 10 то 21 ноябри соли ҷорӣ дар Маркази таълимии Агентии назорати маводи нашъаовар тренинг дар мавзӯи “Такмил додани муқовимати фаврӣ-ҷустуҷӯӣ барои бастани роҳҳои қочоқи маводи нашъаовар ба воситаи хатсайри шимолӣ” оғоз шуд.Тренинг дар доираи Лоиҳаи Шӯрои НАТО-Русия оид ба омӯзиши кормандони мақомоти ҳифзи ҳуқуқи кишварҳои Осиёи Марказӣ, Афғонистон ва Покистон дар самти мубориза бо муомилоти ғайриқонунии маводи мухаддир баргузор гардида, аз ҷониби Намояндагии минтақавии Раёсати СММ оид ба маводи нашъаовар ва ҷинояткорӣ дар Осиёи Марказӣ амалӣ мешавад. Дар доираи тренинг кормандони агентӣ дар мавзӯъҳои баргузории чорабиниҳои гуногуни тактикӣ ва фаврӣ дар мубориза бо муомилоти ғайриқонунии маводи нашъовар омӯзиш мегиранд, ҳамчунин масъалаҳои ҳамкориҳоро дар баргузории чорабиниҳои муштарак таҷриба мекунанд.Тренинг аз ҷониби устодони Донишгоҳи ҳуқуқшиносии Сибири Федератсияи Русия гузаронида мешавад.