Мулоқоти сафири ҶТ бо шунавандагони академияҳои ҳарбии ФР

Душанбе, 11.11.2014. (АМИТ «Ховар», Марҳабои Азамат).- 10 ноябр дар Сафорати Тоҷикистон дар Русия мулоқоти роҳбарияти намояндагии дипломатӣ бо афсарони Вазорати мудофиаи Тоҷикистон, ВКД ҶТ, Кумитаи умури мудофиаи шаҳрвандӣ ва ҳолатҳои фавқулодаи ҶТ, Сарраёсати қӯшунҳои сарҳадии назди Кумитаи давлатии амнияти миллии Тоҷикистон — шунавандагони академияҳои олии ҳарбӣ ва милисаи Русия баргузор гардид.Дар ин бора намояндаи расмии Сафорати ҶТ дар ФР Муҳаммад Эгамзод ба АМИТ «Ховар» хабар дод.Мувофиқи суханони манбаъ, сафири Тоҷикистон дар ФР Имомуддин Сатторов дар ҷараёни суҳбат ба шароити таҳсил, будубош ва ҷиҳатҳои дигари иҷтимоии шунавандагони академияҳо мароқ зоҳир намуд. Сафир ҳамчунин ба ҳозирон аз рушди Тоҷикистон, сиёсати дохилию хориҷии он ба муносибатҳои дуҷонибаи Тоҷикистон бо Русия муфассал нақл кард. Имомуддин Сатторов суханони Президенти ҶТ Эмомалӣ Раҳмонро иқтибос оварда, зикр намуд, ки хидматчиёни ҳарбӣ ва кормандони мақомоти ҳифзи ҳуқуқ бояд ҳамеша ба қасами худ, истиқлолияти давлатӣ ва халқу Ватан содиқ буда, барои зарба задан ба ҳар гуна таҳдиду ситезаҷӯиҳо омода бошанд.Дар мулоқот намояндаи Қувваҳои мусаллаҳи ҶТ дар Ситоди муттаҳидаи СААД генерал — майор Рашид Воҳидов, атташеи ҳарбии Сафорати ҶТ дар ФР Фаридун Раҷабов ва намояндаи ваколатдори Ҷумҳурии Тоҷикистон дар СААД Бадриддин Мирзоев ширкат доштанд.