Намоишномаи «Фирдавсӣ» дар театри Кӯлоб

Кӯлоб, 20.11.2014.  (АМИТ  «Ховар»,  Сулаймони  Хол).- Дирӯз дар Театри  вилоятии мусиқӣ-мазҳакавии ба номи С.Вализодаи шаҳри Кӯлоб намоишномаи ҷолибе намоиш дода шуд. Драмаи Меҳмон Бахтӣ «Фирдавсӣ»   бо коргардонии Ҳунарманди халкии Тоҷикистон М. Миров дар рӯзи нахустнамоиш коршиносону мунаққидони театр, аҳли илму адаби ҷумҳурӣ ва ҳаводорони сершумори санъати театриро ба ҳам овард. Намоишнома, ки аз солҳои охири ҳаёти устод Фирдавсӣ қисса мекунад, дорои саҳнаҳои тарғибгари фарҳангу забон, ҳуввияту худшиносӣ ва бозгашт ба асолати ватандорӣ буда, ҳунармандони театри овозадори ба номи С.Вализода аз иҷрои накшҳои хеш ба хубӣ баромаданд. Хатти сабзи намошномаи мазкур, ки рабти бевосита  ба ҷаҳонишавии замони  муосир дорад, аз ҳар ҷиҳат ба тамошобинон писанд омад, зеро тарғиби осори Фирдавсии бузург ва «Шоҳнома»-и безаволи ӯ тимсоли шуҷоату далерӣ ва мактаби беназири худшиносист, ки ҳар як фарди ҷомеа метавонад аз он сабақ гирад. Ба гуфти коршиносони санъати театрӣ бо ин намоишнома ва аз дигар рӯ овардан ба Фирдавсӣ ва тарғиби ғояҳои  худшиносӣ  театри имрӯзаи тоҷик  ба муваффақиятҳо комёб мегардад. Тавре ки Гулмурод Зуҳуров, Корманди шоистаи Тоҷикистон  иброз  дошт, намошнома дар баробари як драмаи мукаммали психологию фалсафӣ будан, инчунин дорои масъалаҳои комили иҷтимоӣ, аз ҷумла бозтоб намудани  фидокорию инсонпарварӣ, садоқату ишқу муҳаббати беолоиш низ буд.
  Пас аз анҷоми намоишнома аз ҷониби тамошобинону мунаққидон пешниҳод шуд, ки намоишномаи мазкур дар дигар шаҳру ноҳияҳои ҷумҳурӣ  пешкаши тамошобинон гардонида шавад.