Парчами давлатӣ-ҳамқадами Тоҷикистони соҳибистиқлол

Душанбе, 24.11.2014. (АМИТ «Ховар», Мавҷуда Анварӣ). -Дар шаҳри Хуҷанд бахшида ба Рӯзи Парчами миллӣ тантанаи идона баргузор гардид. Раиси шаҳри Хуҷанд Раҷаббой Аҳмадзода ҷамъомадагонро бо ин рӯзи фархунда табрик намуда таъкид кард: «Парчами давлатии Тоҷикистон ҳамқадами соҳибистиқлолии ватанамон буда, дар баробари Конститутсия, Нишон, Суруди Миллӣ ва асъори миллӣ аз ҷумлаи рамзҳо ва муқаддасоти давлатӣ маҳсуб мешавад, ки дар иҷлосияи таърихии XVI-уми Шӯрои Олии Ҷумҳурии Тоҷикистон қабул гардид.
Аз он рӯзе, ки миллати соҳибмаърифати мо соҳиби Парчам гардид, дар ҳаёти мамлакату ҷомеаи кишвар бисёр дигаргуниҳои бунёдӣ ба амал омаданд ва барои пешрафти ҳамаи соҳаҳои иқтисодиёт, илму маориф ва маънавиёти мардум шароити мусоид фароҳам оварда шуд.» 
Дар барномаи консертӣ гурӯҳи ҳамсароёни мактабҳои мусиқии шаҳр, ҳунармандони шинохта Ҳасан Камол ва Нозияи Кароматулло ширкат намуда, табъи ҳозиронро болида сохтанд.