Пешниҳоди Шариф Саид

Душанбе,  21.11.2014. (АМИТ «Ховар»,  Покизаи  Шодмон).- «Тоҷикистон ҷонибдори  ҳамкорӣ бо  Олмон  аст. Имрӯз  сатҳи ҳамкории  тиҷоратию  иқтисодии байни  кишварҳоямон  ба имкониятҳои  мавҷуда  мувофиқат  намекунад», — гуфт раиси Палатаи  савдо  ва  саноати  Тоҷикистон  Шариф  Саид  дар  ҷараёни  мулоқот бо  сафири  Олмон Ҳолгер Грен,  ки  20  ноябр  баргузор  гардид. 
Назар  ба  хабари  ПСС ҶТ, раиси Палатаи  савдо  ва  саноат  дар  ҷараёни  мулоқот  сафирро  бо  соҳаҳои  авлавиятдори  иқтисодиёти  Тоҷикистон,  ки ба маблағгузорӣ  зарурат  доранд,   шинос  кард. Шариф  Саид  ҳамчунин   дар  бораи  имконоти  ба  Олмон  фиристодани  маҳсулоти  аз  нигоҳи  экологӣ тозаи  кишоварзӣ сухан  кард.
Шариф  Саид  ҳамзамон  пешниҳод  намуд, ки  дар  шаҳри  Душанбе намоишгоҳ доир  намуда, ҳамоиши  аҳли тиҷорати  Олмону  Тоҷикистон  ташкил  карда  шавад, зеро  ин василаи беҳтарини  рушду  таҳкими  ҳамкории тиҷоратию  иқтисодӣ  ба  шумор  меравад.