Санҷиши риояи қоидаҳои будубоши шаҳрвандони хориҷӣ
Душанбе, 26.11.2014. (АМИТ «Ховар», Зарангези Латиф).- Гурӯҳи кории Раёсати Хадамоти муҳоҷирати вилояти Суғд дар ҳамкорӣ бо Прокуратураи вилояти Суғд вазъи ҳуқуқӣ ва риояи қоидаҳои будубоши шаҳрвандони хориҷиро дар бозори «Шоҳроҳи Абрешим» таҳти санҷиш қарор доданд.Дар ҷараёни санҷиш муайян шуд, ки ҶДММ КМ «Шоҳроҳи Абрешим» барои фаъолият оид ба таъмин намудани шаҳрвандони Ҷумҳурии Тоҷикистон бо кор дар хориҷа ва ҷалб намудани қувваи кории хориҷӣ ба Ҷумҳурии Тоҷикистон иҷозатнома дошта, барои ҷалби 300 нафар мутахассис аз Чин расман иҷозат дорад.Дар айни ҳол дар ҶДММ КМ «Шоҳроҳи Абрешим» 130 нафар шаҳрванди Ҷумҳурии мардумии Чин ва 360 нафар шаҳрванди Ҷумҳурии Тоҷикистон фаъолият дорад.Ба иттилои сомонаи расмии раиси вилояти Суғд зимни тафтиш ҳуҷҷати зиёда аз 120 нафари онҳо аз назар гузаронида шуда, дар байнашон корҳои фаҳмондадиҳӣ бурда шуданд.