Семинар дар мавзӯи таҳқиқи зиддифасодӣ

 
Душанбе,  25.11.2014. (АМИТ «Ховар»).- Дар  шаҳри  Душанбе  семинари  серӯза дар  мавзӯи таҳқиқи  зиддифасодии  ҳуҷҷатҳои меъёрию  ҳуқуқӣ  ба  кораш  шуруъ  намуд. 
Таваре  ки  аз дафтари  САҲА  дар  ҶТ хабар  доданд,  семинар анҷоми  фаъолиятест, ки  тайи  як  моҳ  давом  карда,  дар  ҳошияи он коршиноси   шуъбаи  миллии Иттиҳодияи  илмию истеҳсолии  байналмилалии  Трансперенси  Интернэшнл  воқеъ дар  Русия дар Агентии  назорати  давлатии  молиявӣ  ва  мубориза бо  коррупсияи ҶТ  ба  манзури тарҳрезии  методологияи  таҳқиқи  зиддифасодӣ мустақиман  кор  кардааст. 
Методологияи  мазкур  ба  мутахассисони Агентии назорати давлатии молиявӣ ва мубориза бо коррупсияи ҶТ,  Прокуратураи  генералии  ҶТ, вазоратҳои   корҳои дохилӣ  ва  адлияи  ҶТ, Агентии  хадамоти  давлатии  назди  Президенти  ҶТ ва Институти  такмили  ихтисоси  хидматчиёни  давлатӣ,  Маҷлиси  намояндагони  Маҷлиси  Олии  ҶТ  ва  ниҳодҳои  дигари  дахлдор барои шиносоӣ  бо  консепсияи  таҳқиқи  зиддифасодӣ  ёрӣ  расонида,  ба ошкор  намудани ҳуҷҷатҳои номукаммале, ки  хилофи нуктаҳои санадҳои меъёрию  ҳуқуқианд,   мусоидат  мекунад. 
Зарурати ҷорӣ намудани механизми таҳқиқи зиддифасодии Иттиҳодияи  илмию  истеҳсолӣ  ба  низоми қонунгузории  Тоҷикистон бори нахуст  дар  Фармони Президенти  ҶТ «Дар  бораи  тадбирҳои  иловагӣ ҷиҳати  вусъат  бахшидани  муқовимат  ба  коррупсия дар  Ҷумҳурии  Тоҷикистон»  таъкид   шуда буд. 
Моҳи  январи  соли  2014 дафтари САҲА   якҷоя  бо Агентии назорати давлатии молиявӣ ва мубориза бо коррупсияи ҶТ тасмим  гирифт, ки барои  курси  таълимӣ  методологияи таҳқиқи  зиддифасодӣ таҳия  ва онро  барои омӯзиш интишор  намояд. 
Мақсад  аз  курси таълимӣ  ва  семинар  дастгирии  ташкили   гурӯҳи  байниидоравии  коршиносони   бахши таҳқиқи  зиддифасодӣ  мебошад.