Шоми имрӯз бархе аз ҷодаҳои пойтахт баста мешавад

                  Душанбе, 24.11.2014.(АМИТ «Ховар», Марзия Саидзода).-Шоми имрӯз шурӯъ аз соати 17:00 то 20:00 дар иртибот ба баргузории роҳпаймоии идонаи сокинони Душанбе бархе аз ҷодаҳои пойтахт, ки ба самти Майдони Парчами миллӣ пайвастаанд, муваққатан баста шуда, ҳаракати воситаҳои нақлиёт дар онҳо қатъ ва маҳдуд мешавад.
    Ба иттиллои Зиёратшо Хушов-муовини сардори  шуъбаи Бозрасии давлатии автомобилии /БДА/ Раёсати вазорати корҳои дохилӣ дар шаҳри Душанбе ҳаракати воситаҳои нақлиёт имрӯз аз соати 17:00 то 20:00 дар хиёбони Рӯдакӣ (аз назди «Кохи Ваҳдат» то чорроҳаи Бухоро /Хонаи матбуот/, хиёбони Исмоили Сомонӣ (аз гардиши хиёбони Абӯалӣ ибни Сино), кӯчаҳои Шероз, Шоҳтемур/Боғи Рӯдакӣ/, кӯчаи Теҳрон /Майдони Дӯстӣ/  ва Фотеҳ Ниёзӣ муваққатан қатъ мешавад.
      Зиёратшо Хушов афзуд, ки ронандагони воситаҳои нақлиёт имкон доранд тавассути кӯчаҳои Исмоили Сомонӣ, Ҳилоли Аҳмар, Фотеҳ Ниёзӣ, Мирзо Турсунзода, Шоҳтемур, Рӯдакӣ, Шевченко ва Бухоро  ҳаркат намоянд.
      Мавриди зикр аст, ки имрӯз 24 ноябр ба ифтихори Рӯзи парчами давлатӣ дар Майдони Парчами миллӣ барномаҳои гуногуни фарҳангӣ ва роҳпаймоии идонаи беш аз 8- ҳазорнафараи сокинони Душанбе баргузор мегардад.