Суғд: пешниҳоди кумак ба соҳибкорони аз сӯхтор зарардида

Хуҷанд, 20.11.2014. (АМИТ «Ховар», Абдуаҳад Шарифзода).-Боздоштани фоизгирии бонкҳо аз маблағҳои гирифтаи ҷабрдидагон, мавқуф гузоштани андозсупорӣ аз рӯи патент ва шаҳодатномаи фаъолияти соҳибкорӣ, гирифтани қарзҳои имтиёзнок, барқарор намудани ҳуҷҷатҳои дар сӯхтор нобудшуда- чунин буданд дархостҳои асосие, ки соҳибкорон дирӯз зимни мулоқот бо сардори Раёсати ВКД ҶТ дар вилояти Суғд баён намуданд. Тавре ки ба хабарнигори АМИТ «Ховар» корманди РВКД ҶТ дар вилояти Суғд М.Юсупов иттилоъ дод, вохӯрӣ бо ташаббуси роҳбарияти мақомоти мазкур доир гашта, мақсади асосии он пеш аз ҳама ба ҷабрдидагон дасти кумак дароз намудан, муайян намудани заминаи фаъолияти минбаъдаи соҳибкорон ва бо ҳамдастии мақомоти дахлдор фароҳам овардани шароити мусоиди корӣ буда, ҳамзамон шинос намудани онон бо ҷараёни тафтишоти пешакӣ ва шунидани арзу дархости ҷабрдидагон буд. 
Зикр шуд, ки то имрӯз тафтишоти пешакӣ 66 соҳибкорро ҳамчун ҷабрдида аз сӯхтори шадиди шоми 15-ум ба 16-уми ноябр ба амал омада баъди бозпурсӣ эътироф кардааст ва он ниҳоӣ нест.  Баҳри дастгирии онон аз тарафи мақомоти маҳаллӣ барои ҷабрдидагон дар ду бозори шаҳр-«20-солагии Истиқлолият» ва маҳаллаи 32-уми шаҳр баҳри фаъолият бурдани онон шароити корӣ фароҳам оварда шудааст.  
Бояд хотиррасон кард, ки шаби 15 ба 16 ноябри соли ҷорӣ  пас аз таркиши балони газ дар қаҳвахонаи “Ҳаниф”, воқеъ дар ошёнаи дувуми бозори “Баҳор” сӯхтор сар зада, он се маркази савдои Хуҷандшаҳр, чун «Тоҷир», «Баҳор» ,»Сино» ва бинои шуъбаи Иттифоқи рассомони вилояти Суғдро фаро гирифт. Дар натиҷа ҳудуди 84 дӯкон дар масоҳати 800 метри мураббаъ сӯхта, зарари он наздик ба 1 млн.сомонӣ арзёбӣ гардид.