Утоқҳои корӣ барои нозирони минтақавӣ

Душанбе, 10.11.2014. (АМИТ «Ховар», Зарангези Латиф).-Дар шаҳри Конибодом Рӯзи милитсия ботантана таҷлил гардида, зимни ҷамъомади идона аз заҳматҳои пайвастаи мақомоти милитсияи шаҳр ёдоварӣ шуд.Дар ҷамъомад ба кормандони беҳтарин, собиқадорони соҳа, оилаҳои кормандоне, ки ҳангоми иҷрои вазифа ҳалок гардидаанд, туҳфаҳои мақомоти иҷроияи ҳокимияти давлатии шаҳр супорида шуданд.Ба иттилои дафтари матбуоти раиси вилояти Суғд бахшида ба рӯзи милитсияи тоҷик дар ҷамоати деҳоти Ҳамробоев утоқи кории минтақавӣ барои кормандони милитсия ба истифода дода шуд. Ин нуқтаи минтақавӣ аз ҷониби мақомоти иҷроияи ҳокимияти давлатии шаҳр ва дастгирии соҳибкорони маҳаллӣ бунёд гардида, яке дар ҷамоати Ҳамробоев ва нуқтаи дигар дар ҳудуди шаҳраки Ҷавонон бунёд ва мавриди баҳрабардорӣ қарор гирифта, дорои тамоми шароитҳои корӣ мебошад.Мавриди зикр аст, ки дар маросими тантанавии баистифодадиҳии ин ду нуқтаи хизматрасонии кормандони милитсия муовини раиси вилоят Ҷумъабой Сангинов, вазири корҳои дохилии ҶТ Рамазон Раҳимзода, муовини аввали раиси шаҳр А. Холматов иштирок ва сухан гуфта, баистифодадиҳии нуқтаи минтақавии ШВКД-ро туҳфаи арзанда дар арафаи таҷлили Рӯзи милитсияи тоҷик арзёбӣ намуданд.