Вохӯрии Шариф Раҳимзода бо Матиас Фекл

Душанбе, 28.11.2014 (АМИТ «Ховар»).- 26 ноябри соли 2014 вазири рушди иқтисод ва савдо Шариф Раҳимзода, ки ҷиҳати иштирок дар “Ҳафтаи Созмони ҳамкории иқтисодӣ ва рушд бахшида ба кишварҳои Авруосиё” ба Париж сафар намудааст, дар Вазорати корҳои хориҷии Франсия бо вазири давлатӣ оид ба савдои хориҷӣ, пешбурди туризм ва масоили фаронсавиҳо дар хориҷа Матиас Фекл вохӯрӣ анҷом дод.
Дар доираи мулоқот ҷонибҳо вазъ ва дурнамои ҳамкориҳои дуҷонибаро муҳокима карда, зикр намуданд, ки тақвият бахшидани пояи шартномавию ҳуқуқӣ байни Тоҷикистону Франсия ба густариши минбаъдаи робитаҳои гуногунҷабҳа саҳмгузор хоҳад буд.
Вазирон дар ҷараёни вохӯрӣ инчунин оид ба масъалаҳои мубрами минтақавӣ, аз ҷумла бо назардошти хурӯҷи неруҳои эътилофи байналмилалӣ аз Афғонистон табодули афкор намуданд.