Ҷамъомади идона дар гимназияи №1

Душанбе, 23.12.2014. (АМИТ “Ховар”, Ситораи Боймурод).-Куҳантарин мактаби шаҳри Хуҷанд, ки дар он академикон Бобоҷон Ғафуров, Солеҳ Раҷабов, котиби якуми Ҳизби Коммунисти Тоҷикистон Ҷаббор Расулов, Нависандаи халқии Тоҷикистон Раҳим Ҷалил, профессорон Муҳаммадхоҷа Бобохоҷаев, Кибриё Ҳасанова ва дигарон таҳсил намудаанд, 90 сола шуд.
Тавре ки дар ин бора хадамоти матбуоти раиси вилояти Суғд хабар додааст, ба муносибати 90-солагии яке аз мактабҳои аввалини вилояти Суғд, гимназияи № 1 — и ба номи Маҳмудхоҷа Беҳбудӣ ҷамъомади идона доир гардид.
Шаҳрдори Хуҷанд дар ҷамъомади идона иттилоъ дод, ки дар соли 2015 барои бунёди толори варзишии ин боргоҳи илму маърифат 400 ҳазор сомонӣ пешбинӣ шудааст ва толори варзишӣ то ҷашни Истиқлолияти давлатии Ҷумҳурии Тоҷикистон мавриди истифода қарор хоҳад гирифт.