Дар боби маводи нашъаовар чиро бояд донист?

Душанбе, 25.12.2014 (АМИТ «Ховар», Лайло Тоирӣ).- Бо мақсади дар амал татбиқ намудани “Стратегияи миллии мубориза бар зидди гардиши ғайриқонунии маводи мухаддир дар Ҷумҳурии Тоҷикистон барои солҳои 2013-2020” кормандони Раёсати Агентии назорати маводи нашъаовари назди Президенти ҶТ дар ВМКБ тибқи нақшаи корӣ оид ба гузаронидани чорабиниҳои зиддимухаддиротӣ бо сокинони махаллаҳои шаҳри Хоруғ, хонандагони синфҳои болоӣ, донишҷӯёни коллеҷи тиббӣ ва Донишгоҳи шаҳри Хоруғ вохӯрӣ ташкил намуданд.
Намояндагони агентӣ ба ҷамъомадагон дар бораи тамоюлҳое, ки ба содир шудани ҷиноятҳо аз ҷониби ноболиғон боис мегарданд, оид ба таъсири нашъамандӣ ба организми ҷавонон, роҳҳои сироят шудан ба касалии ВИЧ-сироят маълумоти муфассал доданд.
Кормандони агентӣ зикр намуданд, ки дар деҳот обрӯ ва нуфузи падару модар дар тарбияи насли наврас аҳамияти калон дорад ва шахсан волидайн барои тарбияи фарзандон дар рӯҳияи рад кардани истеъмоли мухаддирот масъулияти бузург бар дӯш доранд.
Инчунин таъкид гардид, ки аҳолӣ танҳо дар якҷоягӣ бо мақомоти ҳифзи ҳуқуқ, ташкилотҳои ҷамъиятӣ қодир аст ба паҳншавии маводи мухаддир муқовимат намояд, то ки насли наврасро аз ҷалбшавӣ ба нашъамандӣ эмин нигоҳ дорад.
Дар вохӯрӣ инчунин аъзои Шӯрои ҳамоҳангсозӣ оид ба сӯйистемоли маводи нашъаовар, намояндагони Раёсати ҷавонон, варзиш ва сайёҳӣ, сармуҳаррирони рӯзномаҳои ноҳиявӣ ва вилоятӣ, коллективҳои педагогии мактабҳои таҳсилоти ҳамагонӣ иштирок намуданд.
Дар ин бора ба АМИТ «Ховар» аз Агентии назорати маводи нашъаовари назди Президенти ҶТ иттилоъ доданд.