И.Лякин — Фролов: «Русия суръати рушди равобит бо Тоҷикистонро баланд мебардорад»

Душанбе,  25.12.2014. (АМИТ «Ховар»,  Кристина  Эрлих).- «Русия,  сарфи  назар  аз душвориҳои  мавҷуда,  суръати  рушди  равобит бо  Тоҷикистонро дар  ҳамаи  бахшҳои  ҳамкорӣ  баланд бардошта,  Тоҷикистонро  ҳамаҷониба  дастгирӣ  менамояд», — гуфт  сафири  Русия дар  Тоҷикистон Игор Лякин — Фролов.  Дипломати Русия  дар  баробари  ин  суханони  зерини В.В.Путин  зимни  мулоқот  бо Эмомалӣ  Раҳмонро, ки  11  сентябри  соли 2014  гуфта буд,  мисол  овард: «Мо  Тоҷикистонро  иттифоқчии  басо қаринамон мешуморем. Муносибатҳои  мо  аҳамияти  стратегӣ  доранд. Мо  ин  муносибатҳоро  ба дараҷаи баланд  арзёбӣ  намуда, минбаъд  ҳам онҳоро рушду  густариш  медиҳем».
Сафири  Русия  зимни  гуфтораш  бо  журналистон  муҳоҷирати  меҳнатиро  ёдовар  шуда, хотирнишон  сохт, ки Тоҷикистон  ягона  кишварест, ки  Федератсияи  Русия ҳанӯз  соли  1995 шартномаро  дар  бораи  ҳалли  масоили  табаияти  дуҷониба имзо  карда буд. Ин ба  шаҳрвандони  Тоҷикистон  имкон  медиҳад, ки табаияти  Русияро  қабул  намуда, ҳамзамон шаҳрванди  Тоҷикистон бошанд. 
Дар  ҷараёни мулоқот  зикр  шуд, ки  Русия тайи  10  соли охир  ба Тоҷикистон ёрии  моддӣ  мерасонад, ки  имрӯз  маблағи  умумии  он  беш  аз  60  миллион долларро ташкил  медиҳад. 
Дипломати  Русия дар  анҷоми  мулоқот  ба  муносибатҳои Русия  ва  Тоҷикистон  дар  бахшҳои  фарҳангу  маориф дахл  карда,  зикр  намуд, ки  алҳол қариб  7  ҳазор  нафар  донишҷӯёни тоҷик  дар  донишкадаҳои  олии  Русия таҳсил  менамоянд.