Лоиҳаи Кодекси граждании Ҷумҳурии Тоҷикистон дар таҳрири нав

Душанбе, 9.12.2014. (АМИТ “Ховар”, Рафоати Абдулҳамид).- “Лоиҳаи Кодекси граждании Ҷумҳурии Тоҷикистон дар таҳрири нав”- таҳти чунин унвон имрӯз дар Маркази миллии қонунгузории назди Президенти Ҷумҳурии Тоҷикистон мизи мудаввар баргузор гардид.
    Дар  нишаст роҳбарият ва кормандони Маркази миллии қонунгузорӣ, намояндагони Суди ноҳияи Рӯдакӣ, кафедраи ҳуқуқи граждании факултети ҳуқуқшиносии Донишгоҳи миллии Тоҷикистон ва дигар идораҳои дахлдор иштирок намуданд. 
Гуфта шуд, ки тағйиру иловаҳо ворид намудан ба ин ё он қонун далели он нест, ки қонунҳои қабулшуда комилу қонеъкунанда набошанд, зеро ҷамъият дар рушду инкишоф аст ва масъалаҳои зиёдро ба вуҷуд меорад.  Маҳз ҳамин пешравию тараққиёт боис мегарданд, то санадҳои меъёриву ҳуқуқӣ низ дар таҳрири нав  мавриди амал қарор гиранд.
Имрӯз зарурат пеш омадааст,  ки Кодекси  граждании Ҷумҳурии Тоҷикистон низ дар таҳрири нав амал кунад.  Вобаста ба ин иштирокчиён масъалаҳои такмили қисми якум, моҳияти таҳрири нави қисми дуюм,  масъалаҳои консептуалии таҳрири қисми сеюми Кодекси  граждании Ҷумҳурии Тоҷикистон ва дигар масъалаҳои онро мавриди баррасӣ қарор доданд.