Маҷлиси Ҳукумати Тоҷикистон

Душанбе, 29.12.2014 (АМИТ «Ховар»).- Имрӯз таҳти раёсати Президенти Ҷумҳурии Тоҷикистон, Раиси Ҳукумати кишвар Эмомалӣ Раҳмон маҷлиси навбатии Ҳукумати Ҷумҳурии Тоҷикистон баргузор гардид.Дар оғози маҷлис Нақшаи кори Ҳукумати Ҷумҳурии Тоҷикистон дар нимсолаи якуми соли 2015 ва тадбирҳои иҷрои Қонуни Ҷумҳурии Тоҷикистон “Дар бораи Буҷети давлатии Ҷумҳурии Тоҷикистон барои соли 2015” тасдиқ карда шуд. Таъкид гардид, ки барои иҷрои нишондодҳои Буҷети давлатӣ, истифодаи босамару ҳадафманди маблағҳои буҷетӣ ва коҳиш додани таъсири манфии омилҳои беруна тадбирҳои муассир амалӣ карда шаванд.Ҳамчунин фармоиши Ҳукумати Ҷумҳурии Тоҷикистон дар бораи таҳияи нишондиҳандаҳои Буҷети давлатӣ барои солҳои 2016-2018 ва лоиҳаи Қонуни Ҷумҳурии Тоҷикистон “Дар бораи Буҷети давлатии Ҷумҳурии Тоҷикистон барои соли 2016” қабул гардид.Доир ба рафти иҷрои Фармони Президенти Ҷумҳурии Тоҷикистон аз 27 августи соли 2007 “Дар бораи тадбирҳои иловагӣ доир ба рушди соҳаи боғутокпарварӣ барои солҳои 2010-2014” ҳисоботи Вазорати кишоварзӣ шунида шуд.Тавре иттилоъ дода шуд, давоми 5 сол дар 53562 га боғу токзори нав бунёд ёфт, ки ин баробар ба 114,2% нишондодҳои фармони мазкур аст.Сарвари давлат Эмомалӣ Раҳмон таъкид дошт, ки ба бунёди боғҳои интенсивӣ ва боғу токзори меваҳои содиротӣ таваҷҷуҳи зиёд зоҳир карда шавад, зеро талабот дар хориҷи кишвар ба меваю сабзавоти Тоҷикистон хеле зиёд аст.Ҳамчунин дастур дода шуд, ки аз обу ҳавои ҳозираи водиҳои Тоҷикистон пурсамар истифода бурда, дар мавсими кунунӣ ниҳолшинонӣ аз ҳозир вусъат дода шавад ва таъкид гардид, ки барои ниҳолшинонӣ аз баҳор дида ҳоло беҳтар аст.Ба як қатор қонунҳои амалкунанда, аз ҷумла қонунҳо “Дар бораи ҳимояи ҳуқуқи истеъмолкунандагон”, “Дар бораи мораторияи санҷишҳои фаъолияти субъектҳои соҳибкорӣ дар соҳаҳои истеҳсолӣ”, “Дар бораи таъмини нафақаи шаҳрвандон”, “Дар бораи иҷозатномадиҳӣ ба баъзе намудҳои фаъолият” ва ба Кодекси ҷиноятии Ҷумҳурии Тоҷикистон, тағйиру иловаҳо пешниҳод карда шуд.Барномаи давлатии сармоягузориҳо, грантҳо ва сохтмони асосӣ барои солҳои 2015-2017, Стратегия оид ба ғизо ва фаъолияти ҷисмонӣ дар Ҷумҳурии Тоҷикистон барои солҳои 2015-2024, Барномаи рушди иҷтимоию иқтисодии шаҳри Кӯлоб барои солҳои 2015-2019 ва Барномаи рушди иҷтимоию иқтисодии ноҳияи Абдурраҳмони Ҷомӣ барои солҳои 2015-2019 тасдиқ карда шуд.Дар фароварди маҷлис доир ба ҷамъбасти натиҷаҳои рушди иҷтимоию иқтисодии Тоҷикистон дар соли 2014 ва муайян намудани вазифаҳои афзалиятнок барои соли 2015 ва солҳои баъдӣ супоришҳои мушаххас дода шуд. Аз ҷумла дастур дода шуд, ки барои коҳиш додани таъсири манфии омилҳои беруна ба иқтисоди Тоҷикистон нақшаи тадбирҳои зиддибӯҳронӣ таҳия ва пешниҳод карда шавад.Супоришҳо ҳамчунин доир ба таъмини тартибу низом ва пешгирӣ аз сӯхтору дигар ҳодисаҳои нохуш дар рӯзҳои истиқболи соли нави мелодии 2015 дода шуд.
Дар ин бора ба АМИТ «Ховар» аз Хадамоти матбуоти Президенти Ҷумҳурии Тоҷикистон иттилоъ доданд.