Муборизаи муштарак бар зидди маводи мухаддир

Душaнбе, 9.12.2014. (АМИТ “Ховар”, Мавҷуда Анварӣ).- Дар шаҳри Алмаатои Ҷумҳурии Қазоқистон вохӯрии муштараки намояндагони мақомоти ҳифзи ҳуқуқи Афғонистон ва Осиёи Марказӣ вобаста ба инкишофи ҳамкорӣ дар мубориза бар зидди маводи мухаддир баргузор гардид, ки он аз тарафи шуъбаи полис оид ба масъалаҳои стратегии фаъолияти Департаменти таҳдиди фаромиллии САҲА  якҷоя бо Лоиҳаи “Хатсайри героин -2 — шабакаи иттилоотӣ” ва Маркази минтақавии иттилоотии ҳамоҳангсозии Осиёи Марказӣ   ташкил шуд.
Дар вохӯрӣ масъалаҳои ҳамкорӣ дар самти муқовимат ба муомилоти ғайриқонунии маводи нашъаовар муҳокима гардида, инчунин мубодилаи фаврии иттилоот нисбат ба интиқолдиҳандагони ғайриқонунӣ ва хатсайрҳои интиқоли маводи нашъаовар сурат гирифтанд. Иштирокчиёни вохӯрӣ нисбат ба механизм ва васоит, ки ба ҳамкории фаромиллӣ мусоидат менамоянд, табодули назар ва таҷриба намуданд.
Тоҷикистонро дар ин вохӯрӣ муовини сардори шуъбаи иттилоотӣ-таҳлилии Агентии назорати маводи нашъаовари назди Президенти ҶТ Ф. Муродова намояндагӣ кард.