Мусодираи зиёда аз 3 кг маводи мухаддир

Душанбе, 22.12.2014. (АМИТ «Ховар», Муқаддас Темурзода).-Аз ҷониби кормандони милитсия ду шаҳрванди ҷумҳурӣ бо гумони ғайриқонунӣ нигоҳ доштани маводи нашъадор дастгир гардиданд.
ВКД ҶТ хабар медиҳад, ки ҳангоми гузаронидани чорабиниҳои фаврӣ-ҷустуҷӯӣ аз чониби кормандони милитсия шаҳрванд Суҳроб Саидов, соли таваллудаш 1993, сокини шаҳри Душанбе дастгир шуд, ки дар вақти кофтукови шахсӣ аз ӯ 938 грамм маводи нашъадори героин дарёфт ва мусодира гардид.
Инчунин зимни боз як амалиёти махсус кормандони милитсияи ноҳияи Фархор шаҳрванд Мирзоалӣ Сайдалиев, соли таваллудаш 1971-ро  дастгир намуданд, ки  ҳангоми кофтукови шахсӣ аз ӯ 2 кг 402 грамм маводи нашъадори бангдона дарёфт ва мусодира шуд. 
Нисбат ба далелҳои мазкур парвандаҳои ҷиноятӣ оғоз гардида, тафтиш идома дорад.