Нақшаи сохтмони роҳҳои ду-се қабата дар пойтахт

Душанбе, 11.12.2014. (АМИТ “Ховар”, Сабоҳат Қадамзода). — Ҳамарӯза дар кӯчаю хиёбонҳои шаҳри Душанбе танбашавии воситаҳои нақлиёт ба мушоҳида мерасад. Ба иттилои Бегиҷон Зиёев, сармутахассиси Раёсати нақлиёти рӯизаминии  Вазорати нақлиёти кишвар то имрӯз шумораи ҳама намуди воситаҳои нақлиёти рӯизаминие, ки ба қайди давлатӣ гирифта шудаанд, ба 411548  адад расидааст.
Бояд гуфт, ки  бештар танбашавии воситаҳои нақлиёт  дар минтақаҳои  “Садбарг ”,  корхонаи  ”Текстил”, дар назди мағозаи тиҷоратии  “Мардон”,  бозори “Корвон”,  дар гузаргоҳи кӯпруки 46-ум  ба назар мерасад.
 Бегиҷон Зиёев афзуд, ки Ҳукумати Душанбешаҳр  барои бартараф кардани ин мушкилот тибқи лоиҳаи  амалигаштаистода дар чорроҳаҳо сохтани роҳҳои 2-3 ошёнаи таворавиро дар назар дорад.