Назорати марказҳои хизматрасонии бонкӣ

Душанбе, 10.12.2014. (АМИТ «Ховар», Покизаи Шодмон). — Тибқи нақшаи чорабиниҳои Раёсати БДА ҶТ «Амонатбонк» гурӯҳи кории Раёсати БДА ҶТ «Амонатбонк» аз ҳисоби воҳидҳои сохтори дастгоҳи марказӣ бо мақсади вохӯрӣ бо аҳолии ҷамоату шаҳракҳо ва намояндагони табақаҳои гуногуни кишвар бо сафари корӣ дар ноҳияҳои минтақаи Кӯлоби вилояти Хатлон қарор дорад.
Аз маркази матбуоти БДА «Амонатбонк» ба мухбири АМИТ «Ховар» иттилоъ доданд, ки зимни сафар дар шаҳри Кӯлоб, навоҳии Ҳамадонӣ, Восеъ ва Шӯрообод дар вохӯрӣ мизоҷон ва сокинони ноҳияҳо масъалаҳои сатҳи хизматрасонии бонкӣ, фаъолияти марказҳои хизматрасонии бонкӣ дар самти пешниҳоди қарзҳои хурди имтиёзнок, қарзҳои имтиёзнок барои картошкапарварӣ, масъалаҳои интиқоли маблағҳо, ба танзим даровардани технологияҳои муосир дар муассисаҳо ва филиалҳои «Амонатбонк» суҳбати ошкоро ва рӯ ба рӯ доир гардида, ҷараёни корҳои созандагиву ободкориҳо дар филиалҳо ва марказҳои хизматрасонии минтақа мавриди санҷиш қарор дода шуданд. 
Аз ҷониби мизоҷон ва иштироккунандагони вохӯриҳо ҷиҳати хизматрасониҳои кормандони «Амонатбонк» изҳори миннатдориву сипос шуда, ҳамчунин пешниҳодҳои муфид барои беҳдошти фаъолияти минбаъда баён гардиданд. Дар ноҳияҳои дигари минтақаи Кӯлоби вилояти Хатлон сафари кории ин гурӯҳ идома дорад.