Омодагии истеҳсолкунандаҳои маҳсулоти дастӣ ба намоишҳои ҷаҳонӣ

Душанбе, 04.12.2014 (АМИТ “Ховар”, Фарзонаи Давлат).-Маркази тиҷорати байналмилалӣ (МТБ) ба истеҳсолкунандаҳои маҳсулоти дастии Тоҷикистон ҷиҳати омодагии ҳамаҷониба ба намоишгоҳҳои байналмилалии «Албент» (Ambiente), ки дар шаҳри Франкфурти Олмон аз 13-ум то 17-уми феврали соли 2015 ва «Подарки» дар шаҳри Маскави Русия аз 16-ум то 19-уми марти соли 2015 дар назар аст, ёрӣ мерасонад.
Бино ба иттилои МТБ барои расидан ба ин ҳадаф як гурӯҳи мушовирони байналмилалии МТБ доир ба тарроҳӣ ва бозорёбӣ бо як сафари чаҳоррӯза аз 1-ум то 4-уми декабр дар Тоҷикистон қарор дорад. Ин сафар дар чаҳорчӯбаи барномаи “Тақвияти рақобатпазирии содиротии корхонаҳои хурду миёнаи соҳаи нассоҷиву дӯзандагӣ ва рушди тавоноии ниҳодҳои пуштибони тиҷорат дар Тоҷикистон” сурат гирифтааст. Барномаи мазкур аз ҷониби Маркази тиҷорати байналмилалӣ амалӣ ва аз ҷониби Ҳукумати Швейтсария дар чаҳорчӯбаи барномаи ҳамкориҳо дар соҳаи тиҷорат роҳандозӣ мешавад. 
Мутахассисони МТБ дар ҷараёни сафари худ чанд давраи омӯзишӣ баргузор карда, ҳамчунин бо намояндагони Иттиҳоди ҳунармандони Тоҷикистон ва истеҳсолкунандагони дигари маҳсулоти дастӣ ба тариқи инфиродӣ кор карданд. Дар чаҳорчӯбаи давраҳои омӯзишии мазкур, ширкаткунандагон бо бузургтарин намоишгоҳи маҳсулоти хона ва ҳадяҳо — Ambiente ва калонтарин намоишгоҳи ҳадяҳо, ҳунарҳои дастӣ ва маҳсулоти тазйинӣ дар ҳудуди ИДМ — «Подарки» шинос шуданд. 
Гуфта мешавад, ки ҳамасола дар намоишгоҳи Ambiente, ки дар шаҳри Франкфурт баргузор мешавад, 4700 ширкат аз қариб 90 кишвар ва тақрибан 145000 меҳмон аз 160 кишвари ҷаҳон иштирок мекунад. Намоишгоҳи байналмилалии «Подарки» дар Маскав тирамоҳи гузашта мизбони шумораи рекордии 42700 меҳмон ва 669 ширкат аз Русия, ҷамоҳири ИДМ ва кишварҳои дигар буд. Ҳар ду намоишгоҳ макони хубе барои ба намоиш гузоштани навъҳои гуногуни маҳсулот мебошанд. Дар чаҳорчӯбаи намоишгоҳҳо, чандин чорабиниҳои дигар гузаронида мешаванд, ки дар онҳо равандҳои тозатарини соҳаи саноат ба маъраз гузошта шуда, ҳамчунин имконияти барқарор кардани тамосҳои нав фароҳам меояд.