Парламент пешниҳоди Президентро тасдиқ менамояд

Душанбе, 8.12.2014.(амит „Ховар“, Марзия Саидзода).- Фардо 9 декабр вакилони палатаи поёнии Парлумони Тоҷикистон -Маҷлиси намояндагон пешниҳоди Президенти Ҷумҳурии Тоҷикистон Эмомалӣ Раҳмон „Дар бораи интихоб намудани раис, муовини раис ва аъзои Комиссияи марказии интихобот ва раъйпурсии Ҷумҳурии Тоҷикистон“-ро баррасӣ ва тасдиқ менамоянд. 
       Бояд тазаккур дод, ки тибқи моддаи 69 Конститутсия (Сарқонун)-и Ҷумҳурии Тоҷикистон ва банди 2 моддаи 11 Қонуни конститутсионии Ҷумҳурии Тоҷикистон “Дар бораи интихоботи Маҷлиси Олии Ҷумҳурии Тоҷикистон” раис, муовини раис ва 13 нафар аъзои Комиссияи марказии интихобот ва раъйпурсии Ҷумҳурии Тоҷикистон бо пешниҳоди Президенти кишвар аз ҷониби Маҷлиси намояндагони Маҷлиси Олӣ дар давоми 3 рӯзи баъд аз эълон шудани интихобот интихоб мешавад.
     Хабарнигори АМИТ „Ховар“ иттилоъ медиҳад, ки  ба ҳайати Комиссияи марказии интихобот ва раъйпурсии Ҷумҳурии Тоҷикистон намояндагони тамоми аҳзоби сиёсии кишвар, ки расман ба қайд гирифта шудаанд, пешниҳод гардидаанд.