Сайёҳони қувейтӣ орзуи тамошои Тоҷикистонро доранд

Душанбе, 2.12.2014. (АМИТ “Ховар”, Фарзонаи Давлат).- Бо дастгирии Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон бо мақсади рушди минбаъдаи ҳамкориҳо бо давлати Қувейт дар соҳаи туризм Намоишгоҳи туристии “Тоҷикистони меҳмононнавоз — кишвари туризм” бо иштироки 7 ширкати туристии ватанӣ баргузор гардид. Зимни баргузории намоишгоҳ тамоми маҳсулоти сайёҳӣ, маълумотҳои иттилоотии туристӣ ва тавассути навори видеоӣ Тоҷикистони муосир ба маърази намоиш гузошта шуд. Ҳамзамон дар Бизнес-Форуми ширкатҳои туристии Тоҷикистон ва Қувейт масоили ҷалби сайёҳони қувейтӣ, ки хоҳиши тамошои Тоҷикистонро доранд, баррасӣ гардид. Бештари сайёҳони қувейтиро ба кишвар пайраҳаҳои шоҳроҳи бузурги Абрешим ва таъриху фарҳанги баланди тоҷикон ҷалб менамояд, ки соли оянда он дар маълумотҳои оморӣ баҳогузорӣ хоҳад шуд. Дар иртибот ба ин кумита мақсад дорад, ки 3 декабри соли ҷорӣ дар ҷаласаи махсуси худ қувва ва имкониятҳои ширкатҳои сайёҳии ватаниро барои ҷалби ҳарчи бештари сайёҳон аз давлати Малайзия ва Қувейт ҳамоҳанг намуда, имкониятҳои туристии Тоҷикистонро дар Намоишгоҳи байналмилалии ITB Берлин — 2015 тарҳрезӣ намояд.