Шиносоӣ бо сохтмони иншооти ҷашнӣ бахшида ба 3000-солагии Ҳисор

 
Душанбе, 10.12.2014. (АМИТ «Ховар», Зарангези Латиф).- Чанде қабл гурӯҳи кории Вазорати фарҳанги Ҷумҳурии Тоҷикистон аз иншоотҳои сохташавандаи ҷашнӣ — Қасри фарҳанг, Китобхонаи марказӣ, Осорхонаи таърихӣ ва аз ҷараёни корҳои сохтмонӣ дар Қалъаи Ҳисор дидан намуда, бо фаъолияти шуъбаи фарҳанг, Китобхонаи марказӣ, Китобхонаи бачагона, осорхонаи ноҳия ва мактаби бачагонаи санъати ба номи Саид Ҳамроев ва омодагии муассисаҳои фарҳангӣ ба фасли зимистон шинос гардид. 
Бояд тазаккур дод, ки бахшида ба ин санаи таърихӣ, дар ноҳияи Ҳисор сохтмони бинои нави Қасри фарҳанг бо 700 ҷойи нишаст, бинои нави сеошёнаи Китобхонаи марказӣ, бинои чорошёнаи Осорхонаи таърихӣ — кишваршиносӣ, боғи фарҳангу фароғатӣ бо чойхонаи миллӣ дар масоҳати 20 гектар ва тармиму барқарорсозии ёдгориҳои таърихию фарҳангии ноҳия идома доранд.
Дар ин бора аз дафтари матбуоти Вазорати фарҳанги кишвар хабар доданд.