Суғд: Ҳаҷми истеҳсоли маҳсулот ба 3014,8млн. сомонӣ расид

Душанбе, 10.12.2014. (АМИТ “Ховар”, Ситораи Боймурод).- Дар даҳ моҳи соли равон аз ҷониби корхонаҳои саноатии вилоят ҳаҷми истеҳсоли маҳсулот ба 3014,8 млн. сомонӣ расонида шуд, ки суръати афзоиш нисбат ба ҳамин давраи соли гузашта, бо назардошти индекси нархҳо 130,8 фоизро ташкил дода, ба маблағи 717,2 млн. сомонӣ зиёдтар маҳсулоти саноатӣ истеҳсол шуд.
Тавре ки дар ин бора хадамоти матбуоти раиси вилояти Суғд хабар додааст, аз 550 корхонаи саноатӣ 225 корхона вусъати афзоишро нисбат ба ҳамин давраи соли гузашта таъмин намуд. Тибқи нақшаи амал соли 2014 бояд 160 корхонаи нав бо теъдоди 5 ҳазор ҷойи нави корӣ сохта шавад. Дар 10 моҳи соли ҷорӣ 129 корхонаи нави хурду бузург, бо теъдоди 2600 ҷойи нави корӣ ба фаъолият шурӯъ намуд.
Гуфта мешавад,ки корхонаҳои таъсисшуда асосан корхонаҳои соҳаи саноати масолеҳи сохтмон, хӯрокӣ, сабук ва маъданҳои кўҳиро дар бар мегиранд.