Таъмири хонаи бачагон дар Фархор

Фархор,  6.12.2014 (АМИТ  «Ховар», Сулаймон Холов).- Дар хонаи бачагони ноҳияи Фархор 120 нафар наврас ба тарбия фаро гирифта шудааст ва барои беҳтар намудани шароити зисти онҳо аз моҳи октябри соли 2013 бо маблағгузории дирексияи сохтмони иншооти ҳукуматии Дастгоҳи иҷроияи Президенти Ҷумҳурии Тоҷикистон бо ҷалби ду корхонаи сохтмонии маҳаллӣ- Ҷамъияти дорои масъулияти маҳдуди «Сайёр» ва «Суғдиён » бо харҷи умумии 1 миллиону 535 ҳазор сомонӣ аз таъмири асосӣ бароварда шуда, бо хатти озоди барқ таъмин шуд. 
Зикамоҳ Назирмадова, директори хонаи бачагон  гуфт,  ки  аз ҳамин ҳисоб инчунин биноҳои ёрирасон сохта ва қисми дигар аз нав таъмир гардиданд. Барои беҳтар шудани шароити маишии тарбиятгирандагон дирексия ба маблағи 211 ҳазор сомонӣ кату рахтҳои хоб, ҷевону мизу курсӣ барои 120 нафар дастрас ва дар хобгоҳи мактаб муҷаҳҳаз гардонид. Дар хонаи бачагон устохона ва синфхонаи дӯзандагӣ фаъол гардонида шудааст ва аз ин пас тарбиятгирандагон имкон доранд, ки дар баробари таҳсил ба касбомӯзӣ низ машғул шаванд.