Тасмими КМИР ҶТ

Душанбе, 6.12.2014.(АМИТ «Ховар», Марзия Саидзода).- Комиссияи марказии интихобот  ва раъйпурсии Ҷумҳурии Тоҷикистон тасмим гирифтааст 16 декабр дар Душанбе бо иштироки намояндагони Васоити ахбори омма /ВАО/ ва аъзои Комиссиияи марказии интихобот ва раъйпурсии кишвар мизи мудаввар баргузор намояд.
     Шермуҳаммад Шоҳиён-раиси Комиссияи маркази интихобот ва раъйпурсии ҷумҳурӣ мегӯяд, дар ин нишаст, ки дар доираи омодагиҳо ба интихоботи парлумонӣ ва интихоботи маҷлисҳои вакилони халқ баргузор мегардад, таклифу пешниҳодҳои намояндагони ВАО-и кишвар шунида шуда, инчунин аъзои Комиссияи марказии интихобот  ва раъйпурсии Ҷумҳурии Тоҷикистон доир ба низоми баргузории интихоботи парлумонӣ дар кишвар ва пайгирию инъикоси ин чорабинии муҳими сиёсӣ аз ҷониби намояндагони ВАО гузориш медиҳанд.
     Бояд тазаккур дод, ки 5 декабри соли равон  Президенти Ҷумҳурии Тоҷикистон Эмомалӣ Раҳмон Фармон ба имзо расонд, ки тибқи он 1 марти соли 2015 дар Ҷумҳурии Тоҷикистон интихоботи  вакилон ба Маҷлиси намояндагони Маҷлиси Олии Ҷумҳурии Тоҷикистон ва ба маҷлисҳои вакилони халқи Вилояти Мухтори Кӯҳистони Бадахшон, вилоятҳо, шаҳри Душанбе, шаҳру ноҳияҳо таъйин карда шуд. Ҳамзамон дар асоси Фармони мазкур  27 марти соли 2015 интихоботи даъвати нави аъзои Маҷлиси миллии Маҷлиси Олии Ҷумҳурии Тоҷикистон  баргузор мегардад.