Татбиқи лоиҳаи «Рушди чорводорӣ ва чарогоҳҳо» дар навоҳии кӯҳистон
Душанбе, 1.12.2014. (АМИТ «Ховар», Раъно Нусратуллозода).- Муассисаи давлатии Маркази идораи Лоиҳаи «Рушди чорводорӣ ва чарогоҳҳо» дар доираи татбиқи Лоиҳаи «Беҳсозии сатҳи зиндагӣ дар Хатлон» бо мақсади дастгирии мақомоти худфаъолияти ҷамъиятӣ бо назардошти эҳтиёҷоти онҳо дар ҷамоати деҳоти Доғистони ноҳияи Шӯрообод мақомоти худфаъолияти ҷамъиятии «Кафтар» — ро бо техникаи боркашонии худпарто ва техникаи боркунанда таъмин намуд. Бояд гуфт, ки аҳолии ҷамоати деҳоти мазкур аз сабаби набудани чунин намуди техникаҳо, махсусан дар фасли сармо, ки боришот зиёд аст, танқисӣ мекашиданд ва имконият надоштанд, ки молу маҳсулоти худро ба бозорҳо интиқол диҳанд, зеро мушкилоти роҳҳои дохилии деҳаҳо аҳолиро нигарон карда буд.
Тавре ки намояндаи лоиҳаи мазкур Муҳриддин Музаффаров гуфт, таъмин бо техникаҳои зарурӣ имконият медиҳад, ки аз як тараф ҳолати роҳҳои дохили деҳаҳо беҳтар гардад ва аз ҷониби дигар беҳтар гардидани инфрасохтори маҳал барои рушди кишоварзӣ ва чорводорӣ низ мусоидат намояд. Дар маросими супоридани техникаҳо намояндагони мақомоти иҷроияи ҳокимияти давлатии ноҳияи Шӯрообод, роҳбарияти Муассисаи давлатии Маркази идоракунии Лоиҳаи «Рушди чорводорӣ ва чарогоҳҳо», ташкилотҳои байналмилалӣ иштирок намуданд.
Ҳамзамон 27 ноябри соли равон дар ноҳияи Балҷувон маросими расмии ба фаъолият оғоз намудани Лоиҳаи «Рушди чорводорӣ ва чарогоҳҳо» баргузор гардид. Зимни шиносоӣ бо фаъолияти лоиҳаи мазкур иброз гардид, ки Муассисаи давлатии Маркази идораи Лоиҳаи «Рушди чорводорӣ ва чарогоҳҳо», ки бо дасгирии Ҳукумати Ҷумҳурии Тоҷикистон ва Фонди байналмилалии Рушди кишоварзӣ ,дар ҳамоҳангсозӣ бо Вазорати кишоварзии Ҷумҳурии Тоҷикистон, ҳамчунин Агентии иҷроияи лоиҳаҳо фаъолият дорад, оид ба идора ва истифодаи самараноки чарогоҳҳо, дастгирии оилаҳои ниёзманд, алахусус занон, рушди чорводорӣ, беҳтар намудани инфрасохтори чарогоҳҳои маҳаллӣ, беҳтар намудани зоти чорво ва дар ин замина дар баланд бардоштани сатҳи зиндагии аҳолии ноҳияи Балҷувон мусоидат менамояд.