Таваҷҷуҳ ба забономӯзии муҳоҷирон

Душанбе, 11.12.2014. (АМИТ “Ховар”, Ситораи Боймурод).- Тавре ки маълум аст, аз 1-уми январи соли 2015 ҳангоми воридшавӣ ба қаламрави Федератсияи Русия муҳоҷирони меҳнатӣ бояд дар мавриди донистани забони русӣ ҳуҷҷат пешниҳод намоянд. Ин водор месозад, ки ба масъалаи забономӯзонии онҳо диққати махсус дода шавад.
Тавре ки дар ин бора хадамоти матбуоти раиси вилояти Суғд хабар додааст, бо назардошти ин нукта ҳафтаи сипаришуда бо ташаббуси шуъбаи Хадамоти муҳоҷират дар шаҳри Хуҷанд дар литсейи касбӣ-техникии №56 масъалаи мазкур мавриди баррасӣ қарор гирифт.
Гуфта мешавад, ки дар машварат намояндагони маркази таълимии калонсолони шаҳри Хуҷанд, ноҳияи Ҷаббор Расулов, ноҳияи Бобоҷон Ғафуров, литсейи касбӣ-техникии сохтмонии шаҳри Хучанд андешаҳои худро баён намуданд.
Онҳо тасмим гирифтаанд, ки дар оянда шумораи курсҳои омӯзиши забони русиро зиёдтар намоянд.