Туҳфаи Р. Аҳмадзода ба кӯдакону пиронсолони маъюб

Хуҷанд, 31.12.2014. (АМИТ “Ховар”, Абдуаҳад Шарифзода).-Дар арафаи соли нави мелодӣ раиси шаҳри Хуҷанд аз будубоши бошандагони мактаб-парваришгоҳи махсуси ёрирасон ва Хонаи пиронсолон ва маюбони шаҳр дидан намуд. Тавре ки ба АМИТ “Ховар” аз маркази матбуоти роҳбари шаҳр иттилоъ доданд, Раҷаббой Аҳмадзода зимни аёдат дар чорабинии солинавии бошандагони ин ду муассисаи иҷтимоӣ иштирок намуд. Раиси шаҳр дар мактаб-парваришгоҳ бо тарбиятгирандагони ин муасссиса мулоқоти самимӣ анҷом дода, онҳоро бо фарорасии соли нави мелодӣ табрик намуда, барномаи ҷолиби солинавии омода намудаи онҳоро дида, ба онон туҳфаҳои солинавӣ супорид. Сипас дар хонаи пиронсолон бо аҳволи 61 нафар шахси бесарпаноҳ ва бепарастормонда шинос шуда, бошандагонро бо соли нави мелодӣ табрик намуда, изҳор дошт, ки мақомоти ҳокимияти давлатии шаҳр доимо ғамхор ва сарпарасти онон буда, ҷиҳати фароҳам овардани шароити мусоид ва ҳифзи саломатии бошандагон кӯшиш дорад.