Вохӯрии собиқадорони мақомоти амнияти давлатии Тоҷикистон дар Маскав
Душанбе, 10.12.2014. (АМИТ «Ховар», Марҳабои Азамат).- 20 декабр чекистҳои саросари кишварҳои пасошӯравӣ иди касбии худ – 90 – солагии таъсиси мақомоти амнияти давлатиро таҷлил менамоянд. Собиқадорони мақомоти амнияти давлатии Тоҷикистон дар арафаи ин санаи фархунда 90 – умин солгарди таъсиси Кумитаи амнияти давлатии Тоҷикистонро дар шаҳри Маскав таҷлил намуданд.
Дар ин бора намояндаи расмии сафорати ҶТ дар ФР Муҳаммад Эгамзод ба АМИТ «Ховар» хабар дод.
Назар ба иттилои манбаъ, ба ин муносибат дар меҳмонхонаи «Варшава» — и шаҳри Маскав бо иштироки собиқадорони мақомоти амнияти давлатӣ, чекистҳое, ки солҳои гуногун дар қаламрави ҷумҳуриамон хидмат кардаанд, иқдоми ботантана баргузор шуд.
Собиқ раиси Кумитаи амнияти давлатии назди Шӯрои Вазирони ҶШС Тоҷикистон (солҳои 1975 – 1985), генерал — майор Евгений Первентсев, собиқадорони хадамоти махсус ва иштирокдорони дигари чорабиниро бо рӯзи таъсисёбии мақомоти бехатарии Тоҷикистон муборакбод карда, ба онҳо дар иҷрои вазифаашон муваффақиятҳо ва сулҳу ризоият дар Тоҷикистонро орзу намуд.
Назар ба гуфтаи Муҳаммад Эгамзод, аз рӯи натиҷаи вохӯрӣ ба ифтихори 90 — солагии таъсиси мақомоти амниятии Тоҷикистон табрикномаи Кумитаи тадорукоти чорабинӣ унвонии раиси Кумитаи давлатии амнияти миллии Ҷумҳурии Тоҷикистон Саймӯъмин Ятимов қабул шуд.
Маҳфил бо барномаи дилпазири консертӣ анҷом ёфт, ки дар он сурудҳои халқию ватандӯстӣ ба забонҳои русию тоҷикӣ танинандоз шуданд.