Ёрӣ ба мактабиён
Роштқалъа, 30.12.2014. (АМИТ «Ховар», Файзи Мирҳасан).- Шӯрои адлияи ҶТ сарпарастии мактаб — интернати назди мактаби таҳсилоти умумии ноҳияи Роштқалъаро ба ӯҳда гирифта, дар арафаи Соли Нав ба он дасти ёрӣ дароз кард.
Ба гуфтаи манбаъ, тайи соли охир Шӯрои адлия ба мактаби мазкур ба маблағи 54 ҳазор сомонӣ ёрии моддӣ расонид. Интернати мактаби таҳсилоти умумии рақами 26 солҳои зиёде фаъолият дошта, имрӯз бисёр дастпарварони он дар бахшҳои мухталифи иқтисоди вилоят фаъолият доранд.
Алҳол дар интернат 55 нафар хонандагон таҳсил намуда, барои зисту таҳсили онҳо ҳамаи шароит фароҳам карда шудааст. То имрӯз дар ин ҷо барои фасли зимистон 29 тонна ангишт ва 30 метри мукааб ҳезум тайёр карда шудааст.
Мувофиқи суханони директори мактаб Дороншоҳ Кабутаршоев, соли ҷорӣ ба мактаб ба маблағи 46 ҳазор сомонӣ ёрии моддӣ расонида шуд.
Раиси суди вилоятӣ Саидмусаллам Шоҳмусалламов изҳор дошт, ки минбаъд ҳам ба мактаб — интернат дасти ёрй дароз карда мешавад.