Қайроққум: вусъати маъракаи “100 рӯзи ниҳолшинонӣ”

  Қайроққум, 31.01.2015. (АМИТ “Ховар”, Абдуаҳад Шарифзода).-Бо иқдоми раиси шаҳри Қайроққум дар ҳудуди марказ ва шаҳракҳои тобеи шаҳр маъракаи ободкорӣ ва дар ин замина ниҳолшинонӣ дар доираи «Амалиёти 100 рӯзи ниҳолшинонӣ» рӯз аз рӯз вусъати тоза пайдо мекунад. 
Тавре ки ба хабарнигори АМИТ “Ховар” аз дастгоҳи раиси шаҳри Қайроққум  иттилоъ доданд, тибқи дастури раиси шаҳр Матлуба Сатториён ва инчунин бо мақсади ободу зебо гардонидани шаҳри фароғатии соҳили «Баҳри Тоҷик», ҷойҳои фароғативу истироҳатии шаҳрвандон, кӯчаву гулгашту боғҳо дар миқёси шаҳри Қайроққум ва шаҳракҳои тобеи он дар раванди баргузории шанбегиҳо, инчунин маъракаи ниҳолшинонӣ низ ҷараён дорад. 
Тибқи маълумоти манбаъ, то имрӯз  аз ҷониби ташкилоту корхонаҳои шаҳр, аз ҷумла — ҶДММ Осоишгоҳи «Баҳористон», КДФ «Хоҷагии манзилӣ- коммуналӣ»-и шаҳр, гимназияи ба номи Б.Ғафуров зиёда аз 3000 бех ниҳоли гуногуни ҳамешасабзу сояафкан шинонида шудааст.