Ҳалокати 13 нафар бар асари ҳодисаҳои фалокатовар дар истеҳсолот

Душанбе,  09.01.2015. (АМИТ «Ховар», Кристина  Эрлих).- «Нозирони хадамот тайи  соли  2014 дар корхонаҳои  саноатии  кишвар 15  ҳодисаи фалокатоварро ба  қайд  гирифтанд, ки  дар натиҷаи онҳо  13  нафар  ҳалок  гардидааст», —  гуфт  сардори Хадамоти  назорати  давлатии  иҷрои  бехатари корҳо  дар   саноат  ва  назорати  маъдани назди Ҳукумати  ҶТ  Сиҷоуддин Саломзода  дар  ҷараёни  нишасти  матбуотӣ, ки имрӯз,  9  январ,  баргузор   гардид.
Сиҷоуддин  Саломзода  зикр  намуд, ки  асосан  ҳодисаҳои   фалокатовар  дар  корхонаҳо  барои  риоя  нашудани қоидаҳои  бехатарии  саноатӣ ва  бепарвоии  худи  кормандон рух  медиҳанд. 
«Аз  рӯи  ҳамаи  ин  ҳодисаҳои фалокатовар таҳлили  махсуси  техникӣ  сурат  гирифта,  барои  таъмини  талаботи  меъёрию  ҳуқуқӣ  ҷиҳати  баланд  бардоштани  сатҳи  бехатарии  саноатӣ  дар  Тоҷикистон  ҳамаи  чораҳои  заруриро  мебинем», —  гуфт  роҳбари  хадамот.
Қобили  зикр  аст, ки   кормандони  хадамот  дар  давраи  ҳисобот  нисбат ба кормандони  масъулиятноки корхонаҳое, ки  қоидаҳои бехатарии  саноатиро  риоя  накардаанд,  чораҳои  маъмурӣ  дида,   онҳо  ба  маблағи  104 ҳазору  640 сомонӣ  ҷарима баста  шудаанд.