Ҳамкории судманди олимони хориҷӣ бо Донишгоҳи тиббӣ

Душанбе,  12.01.2015. (АМИТ «Ховар»,  Фарзона  Достонзода).- «Конфронсҳои  илмию  амалии солонаи Донишгоҳи   давлатии  тиббии  Тоҷикистон ба номи  Абӯалӣ  ибни  Сино  ҳар чи  бештар  таваҷҷуҳи   олимону мутахассисони  хориҷиро ба  худ  ҷалб менамоянд»,  —  гуфт дар  ҷараёни  нишасти  матбуотӣ ректори ДДТТ Убайдулло  Қурбонов. 
Зикр  шуд, ки  соли  2014  дар Донишгоҳи  тиббӣ  се конфронси   илмию амалӣ  бо  иштироки  50  нафар  олимону  мутахассисони   кишварҳои  хориҷӣ  баргузор гардида, се  маҷмӯаи  маводи  конфронсҳо   иборат  аз  970  мақола  чоп  шуд. Ба  гуфтаи  Убайдулло  Қурбонов, як  қисми  ин  мавод маҳсули  фаъолияти  илмию  тадқиқотии мутахассисони  хориҷӣ  ба  шумор  меравад.
Ёдовар  мешавем, ки  конфронсҳои  ҷумҳуриявию  байналмилалӣ  яке  аз бахшҳои  муҳими  фаъолияти ДДТТ  дар  рушди  фаъолияти  илмию тадқиқотии он  маҳсуб  меёбанд.