Ҳукумат ғамхориро нисбат ба ҷавонон идома медиҳад

Душанбе, 24.01.2014 (АМИТ «Ховар», Фарзонаи Давлат).- Барои рушди солимии ҷомеаи кишвар ва ҷалби наврасону ҷавонон ба варзиш тайи панҷ соли охир 19 варзишгоҳ, 621 майдонча ва 110 толори варзишӣ, 11 ҳавзи шиноварӣ ва 9 маҷмааи варзишӣ ба истифода дода шудааст,-зикр кард Эмомалӣ Раҳмон, Президенти кишвар зимни ироаи Паёми солонаи хеш ба Парлумон.
Инчунин 2700 майдонча ва 635 толори варзишӣ, 14 ҳавзи шиноварӣ ва 5 маҷмааи варзишӣ таъмиру навсозӣ гардидааст.
Вобаста ба ин, таъкид кард, ки бо мақсади оммавигардонии варзиш ва таблиғу ташвиқи тарзи ҳаёти солим иншооти мазкури варзишӣ дар ҳолати хуб нигоҳ дошта, самараноку мақсаднок истифода шаванд.
-Ҳукумат ғамхориро нисбат ба наврасону ҷавонон минбаъд низ идома бахшида, ба ин неруи тавонои кишвар, ки марзу буми Тоҷикистонро ҳимоя мекунад, кишварро ободу зебо мегардонад ва номи ватани аҷдодиро боз ҳам баланд мебардорад, ҳамеша такя менамояд,- таъкид кард Эмомалӣ Раҳмон дар Паёми солонаи хеш ба Парлумони кишвар.