Ҷашнвораи «Интерпол»
Душанбе, 29.01.2015. (АМИТ «Ховар»).- Имрӯз Дафтари марказии миллии «Интерпол» — и Вазорати корҳои дохилии Ҷумҳурии Тоҷикистон 10 — солагии рӯзи таъсисашро таҷлил мекунад.
Назар ба хабари ВКД ҶТ, вазири корҳои дохилии ҶТ Рамазон Раҳимзода иброз дошт, ки фаъолияти Дафтари марказии миллии «Интерпол» тайи ду соли охир самарабахштар гардид.
Имрӯзҳо «Интерпол» шароити мусоид дошта, бо таҷҳизоти муосир таъмин аст. Бо дастгирии Сарвари давлат ва роҳбарияти ВКД «Интерпол» бо мошини хидматӣ таъмин гардида, ду нафар корманди он соҳиби хона шуд.
Дар ин муддат 2 ҳазору 500 нафар шахсоне, ки дар қайди ҷустуҷӯ қарор доранд, дастгир шуда ва ба ҷавобгарӣ кашида шуданд.
Маркази миллии «Интерпол» — и ВКД ҶТ бо ҳамаи ҳамтоёни хориҷии кишварҳои узви ин созмон ҳамкорӣ дорад.
Ёдовар мешавем, ки «Интерпол» созмони байналмилалии ҳифзи ҳуқуқ буда, бо тасмими Конгреси байналмилалии пулис соли 1923 дар шаҳри Вена таъсис ёфта буд.
Дафтари миллии марказии «Интерпол» — и Ҷумҳурии Тоҷикистон дар ҷаласаи 73 — юми Ассамблеяи генералӣ, ки 5 октябри соли 2004 дар шаҳри Канкуни Мексика баргузор гардид, узви ин созмон гардид.
Ёдовар мешавем, ки созмони мазкур бо Қарори Ҳукумати Ҷумҳурии Тоҷикистон аз 28 январи соли 2005 «Дар бораи таъсиси Дафтари миллии маркази «Интерпол» — и Ҷумҳурии Тоҷикистон дар сохтори Вазорати корҳои дохилӣ» таъсис ёфт.
Кормандони дафтари мазкур барои иҷрои поквиҷдононаи вазифаҳояшон, ҳамчунин ба ифтихори ин ҷашн бо медали «10 — солагии Дафтари миллии марказии «Интерпол» — и ВКД Ҷумҳурии Тоҷикистон сарфароз шуданд.