Ҷ. Нурмаҳмадзода: “Сармояи умумии “Амонатбонк” ба 222 млн. сомонӣ расид”

 
Душанбе, 13.01.2015. (АМИТ «Ховар», Покизаи Шодмон). — «Сармояи умумии Бонки давлатии амонатгузории “Амонатбонк” то якуми январи соли 2015  ба 222 млн. сомонӣ расид, ки ин нишондиҳанда нисбат ба ҳамин давраи соли гузашта 18,3% зиёд аст”, — гуфт зимни нишасти матбуотӣ раиси раёсати БДА “Амонатбонк”13 январи соли равон.  
Маврид ба зикр аст, ки дороиҳои бонк то 31 декабри соли 2014  маблағи 1,8 млрд. сомониро ташкил дода, нисбат ба аввали сол ба андозаи 37% афзудааст. Пардохтпазири бонк дар сатҳи баланд нигоҳ дошта шуда, маблағҳо сари вақт ба ҳисобҳои дахлдор гузаронида шуданд.
«Дар давраи ҳисоботӣ даромади тавозунии бонк то андозбандӣ маблағи 45,5 млн. сомонӣ ва  баъд аз андозбандӣ маблағи 26,5 млн. сомониро ташкил намуд, ки нисбат ба соли гузашта 20,8% зиёд аст”, — зикр дошт Ҷамшед Нурмаҳмадзода, раиси   Раёсати   БДА   ҶТ   «Амонатбонк»
  Ҷамшед Нурмаҳмадзода афзуд, ки дар соли 2014 аз ҷониби филиалҳои “Амонатбонк” ҳамаи андозҳо ва пардохтҳои умумидавлатӣ мувофиқи меъёрҳои муқарраргардида сари вақт ба буҷаи  ҷумҳуриявӣ ва  маҳаллӣ  гузаронида  шуданд. Дар  соли ҳисоботӣ ба суратҳисобҳои транзитии андозу пардохтҳои ҳатмӣ маблағи  2,2 млрд. сомонӣ ва маблағҳои саҳмияҳои суғуртаи иҷтимоӣ дар ҳаҷми 1,9 млрд. сомонӣ ворид шуда, ба суратҳисобҳои марбута гузаронида шуданд, ки нисбат ба  соли 2013   мутаносибан 11,1%  ва  24,9%  зиёд мебошанд.