5,1 фоиз афзудани маҳсулоти саноатӣ

Душанбе, 21.01.2014. (АМИТ “Ховар”, Ситораи Боймурод).- Тибқи иттилои Агентии омори назди Президенти Ҷумҳурии Тоҷикистон маҷмӯи маҳсулоти дохилии истеҳсолшуда дар моҳҳои январ-декабр соли 2014 аз рӯи маълумоти фаврӣ 45602,2 млн. сомониро ташкил дод, ки нисбат ба моҳҳои январ-декабри соли 2013 бо нархҳои муқоисавӣ 106,7 фоиз мебошад.
Гуфта мешавад, ки дар соли 2014 дар ҷумҳурӣ ба маблағи 10528,6 млн. сомонӣ маҳсулоти саноатӣ истеҳсол шудааст, ки нисбат ба моҳҳои январ-декабри соли 2013-ум 5,1 фоиз афзудааст.
Дар саноати истихроҷ ҳаҷми истеҳсолот 1398,6 млн. сомонӣ, саноати коркард 6956,3 млн.сомонӣ, дар истеҳсолу тақсимоти неруи барқ, газ ва об 2173,7млн. сомониро ташкил дод.
Дар соли 2014 аз 1183 корхонаи саноатии ҳисобдиҳанда 149 адади он  кор накард. Дар соли 2014 истихроҷи ангишт, маводи ғайримаъдании бинокорӣ, намаки ошӣ, истеҳсоли гӯшт, колбаса, панири равғанин, маҳсулоти шири холис, макарон ва маҳсуноти қаннодӣ, оби ҷав, мусалласи ангурӣ, нӯшокиҳои беспирт, обҳои минералӣ, газворҳои пахтагин, матоъҳои нобофта, қолин ва маснуоти қолинӣ, маснуоти ҷӯробу пайпоқ, пойафзол, пӯст, пойафзоли резинӣ, семент, хишти бинокорӣ, трансформаторҳо, маснуот аз пластикаи филизӣ ва ғайраҳо афзуд.